Sunday, July 24, 2011

ගැටවර කන්ද_______

මහ වනයක් මැද
තමන්ගෙ පාඩුවෙ
බිමත් බලාගෙන
ගලා බහින ගඟ
දැක දැක ඉන්නට
බැරි හැටි කන්ඳට

ඇය දුටු මුල් දින
සිට මේ කන්ඳට
නින්දක් නැති බව
කියනව හරියට

පසු දින අලුයම
හිරු නඟිනා විට
මඟ රැකගෙන හිඳ
''ගුඩ් මෝර්නින් ගඟ''
කියනව හෙමිහිට
නෑසෙන තරමට
අහල පහළ ඉන්නා
කඳු ගැටයට

හොරැහින් බැලුවත්
නොඇසුන ගානට
අඩම්බරයෙන්
ඔරවා කන්ඳට
ඇය යයි සන්සුන්
ගමනින් දිගටම

කහ මල් ගවුමක්
ඇඳ ගී මුමුණන
මිටියාවත පීරා
එන මඳ සුළඟට

කොඳුරා කිව්වලු
කන්දක දුක් ගීතය

ලා නිල් පැහෙයෙන්
දිදුලන ඇගෙ වත
විනිවිද පෙනෙනා
සළු හඳිනා ගත
යන එන විට
කඳු සිඹිනා කෙස් රොද

ඇය දුටු මුල් දින
මගෙ සිත ගත් බව
කියන්න සකිසඳ
ඇය එන මඟ හිඳ






ඉනාව______

මුළු ජීවිතේම පීර පීර හොයපු
ආදරේ,,
කියා දුන්නු හිනාව
ඔයාගෙ මුහුණෙන් දැක්ක වෙලාවෙ
නොදැක්ක වගේ
අහක බලාගත්තනම්
ඇත්තමයි
මගේ හිතට අද මෙච්චර ලෙඩ දුක් නැහැ,,

නුඹ සහ මම __________

නොලැබෙන බව දැන දැනම
වෙන්ව යන්නට මොහොතක් තියා
මගේ හිත මත
ආදරය ලියා
ජීවිතය ලියා නොදීම
හැර දමා ගිය
''නුඹ''

නුඹේ ආදරේ
වෙනකෙකුගේ හදවතින්
සොයමින්
අඳුරේම අත පත ගා
ජීවිතේ සොයන
''මම''

ජීවිතේ ලස්සනයි_________ද?

හැපෙනවා..
වැටෙනවා..
අයෙම නැඟිටිනවා..
හිනා වෙනව..
අඬනවා..
ආදරෙත් කරනවා..
හමු වෙනව..
වෙන් වෙනව..
තත්පරෙන් තත්පරේ වෙනස් වෙනවා..
ඒ මොන කරදර තිබුනත්
වෙලාවකට
ජීවිතේ හරි ලස්සනයි..

Thursday, July 21, 2011

වෙඩි වැදුනු සමනළ්ලු________

විලෝ ගස් යාය මැදින් පියාඹා එන
නෙක පැහැති සමනලුන්,,

කඳුකරේ සැඟව
පතොරම් තුවක්කුව
මානා සිටින අනංගයා අතින්
වෙඩි කා මිය යාමට නියමිතය

එක පෙලට පියඹා එන
සමනලුන් එකා දෙන්නා
හදවත හැඩයෙන් සැකසූ
පතොරම් ඉදිරියේ
නිර්භීත පෙම්වතුන් මෙන්
පපුව දී
මිය ගොස්
තණ බිම මත
පතිත වෙති

අතරින් පතර
වෙඩි නොවදින ඇඳුම් හැඳ
කල්තියා සූදානම් වී පැමිණි
සමනලුන් දිවි ගලවාගෙන
නැවතත් විලෝ ගස් අතර සැඟවෙති

කළුවර ගලා එන
හවස් යාමෙට
තණ බිම වෙත පැමිණෙන
පුංචි කොළුවෙකු
මල් පියළි අහුලනු
ඈතට පෙනුන මුත්
එහි පැමිණෙන්නේ
අනංගයාම බවත්
ඔහු අහුලන්නේ මල් පියළි නොව
සමනල් පියාපත් බවත්
විලෝ අතු හොඳින් හඳුනති




Wednesday, July 20, 2011

අව්රෝරා කුමරිය__________


අව්රෝරා කුමරිය
සියවසක නිදි ගැට හැර බලා සිටිනු

නපුරු මායාකාරිය
මග දිගට එලනලද
මායම් දැල ඉරා
සිරුර සම් මස් ඇට
දවායන තරම් රුදුරු
ගිනි දැල් විදින
ලේ පැහැති මකරුන් මරා
එන්නම් නුඹ සොයා,,,

අව්රෝරා කුමරිය
මා එන්නටත් කලියෙන්
කුමර වෙස් ගත්
ගමේ ගොඩේ රස්තියාදුකාර
කොලු ගැටයන් විත්
නුඹෙ දෙතොල සිඹීවි
තවම නිදි මෙන්
දෙනෙත් වසාගත්වනම
සිටින්
මා වෙනුවෙන්ම..

එදවස
මහජන උද්‍යානය වසා සිටි
නා රුක මුල හිඳගෙන
බිම වැටී තිබී
හිස ගැසූ නාමල
තවම සුවඳද??

කුමරිය සොයා එමි
හැකි ඉක්මනින්
සයනයේ වැතිර
දෙනෙත් වසාගෙන
සිටින් නිදිමෙන්
මා විත්
නුඹෙ දෙතොල 
සිඹින තුරු,,


Monday, July 18, 2011

මට නුඹත් එපා__ නුඹෙ කවිත් එපා________

ඔයා සඳ ගැන
ලියන කවි දැන්
කියවලම මට ඇති වෙලා


අහුවුනොත් හෙම
වැරදිලාවත්
දිනෙක මට ඔබ
ඔය කියන සඳ


මඟ තොටේ
යන එන වෙලාවක


කියමි ඔබෙ කවි
එකම හුස්මට...


සඳට වෙන්නේ
ඇගේ කන් වල
කිරළ ඇබ ගෙන 
ගසා ගන්නට



ගී ගයන කඳුල නුඹ_______

ඉකි ගසන හිත
තෙමා සලිත කර
ගලන විට සීතට
ලා පැහැති කඳුලු බිඳ....


ගෙන හෙමින්  ඇඟිල්ලට
ලo කලෙමි
සවනට...


දුර්වල හඬින් ගයන
විලාප ගීය නුඹයි
එහි රැඳුන


- සඳ සාවා වෙතට -

මීට ඉස්සර
කඳුකරේ දුව පැන
ආදරෙන් අපි
හිටියා තුරුළුව

දවසක් ඔයා කිව්ව
හඳට ගිහින්
කිරියි
පැණියි
අරන් එන්නම්,,

වෙනද වගේම
උඳුපියළිය ගාල මත
වැතිර ගෙන කමු
අපි රස කර,,

එහෙම කිව්ව ඔයා
හඳට යන කෝච්චියෙ
ඉස්සරහම නැඟල යන්න ගියා
මට අතකුත් වනල,,

හඳේ හෙවනැල්ල
පොළොවට වැටෙන තැන,,
නොවරදවාම හැමදාමත්
එනව කිව්ව වෙලාවටම ඇවිත්
බලන් ඉන්නව මo තාම...

ඔයාට තාම හම්බුනේ නැද්ද
කිරි පැණි??
                                                                               - සාවිගෙන් -



නුඹ එන තුරු_____

මඟ බලන දෙනුවන සනසන්න එනු මැන
සත් සමුදුරම පීරා..
කිතිකැවෙන හදවත පුරවන්න හිමිහිට
ආදරය ගෙන අතුරා..
සඳ එළිය දෝතට ගෙන ඇවිත් මා වෙත
දෝවන්න මා වතම සනහා..
නා දළු දෙතොල් පෙති සිපගන්න පෙම්වත

සුළඟ මෙන් හමනා..



ඟං දිය මම නම්______මහ මුහුද නුඹ

කහ මල් පියළි
වැටී සැරසුනු 
නිල් පැහැති ගවුම හැඳි 
ගං දිය
ගලයි හෙමිහිට 
නිදැල්ලේ නිහඬවම

සැඩ රළ පහර
කුණාටු සුළං කෝඩ
නවතා මොහොතකට
සුදු පෙණ කැටි දෑත් විහිදා
ඇයව තුරුලට ගන්නා බව
දැන දැනම
ආදරෙන්
මහ මුහුද...








ප්‍රේමය දුටු තැන___භාවනාව

මහ කැලයක් මැද..
භාවනනුයෝගීව සිටි තව්සෙක් 
කියල දුන්න මට..

''ප්‍රේමය ''
නම් වූ මාර දූතිකාවට
වශී වූ..
මාගෙ හදවත ඉන් ගලවා ගන්නා
මහා බලසම්පන්න
භාවනාවක්..

ඇය දුටු පමණින්
සිත ගත එක් තැන් කොට
අත්හදා බලනව අද පටන්
මම ඒ භාවනාව..




පෙම් සඳ________

ඉනු මැන සුපුන් සඳ සේ පායා
තුරුල් වී
පෙම් සිත සීත සඳ කිරණින් 
දෝවා,,

ඇවිද යමු ඔබ හා මා
සිහින මාවත සිසාරා
ගත වෙලී පෙමිනා,,
දෙනෙත් ගැල්වූ අඳුන නුඹ වී
පෙමින් දිදුලන තරු දෑස සිඹිනා,,

නිල් මල් විල වටා
පිපි මල් නෙලමිනා
වරලසෙහි රඳවා
තුරුල් වෙමි නුඹ හා,,




‎- ආදරය තහනම්ද මට? -

කුණු ගෑවුන ගවුම හැඳි
ජරා වාස වී ගිය
තරුණ ගතකට 
හිමි කම් කියන
සොඳුරු සිත
අ‍යැදියි ආදරය
කුසගින්න අමතකව,,

බෙන්ස් රියෙන් බැස
ටින් කබලට කාසි කොල දමා යන
ඔබේ සොඳුරු රුව සොයයි
සුපිරි වෙළඳ සැල අසල
සැම දින
පව්කාර
සිඟන මා දෑස..




ඔබ ________කොහිද?

ඔබ සොයා නෙතු..මං මුලා වී..
දහදිය කඳුලු වගුරා
වෙහෙස වී..සිනා නගන දෙතොල
තෙමයි.....,,,,,,





ප්‍රේමය______ද?

කඳුලු පිස දා සිනා රැන්දුව
වාරු නැති හද කෙලින් ඉන්දුව
මිතුරු වෙසකට මුවා වී හිඳ
ඔබේ හිත මට පෙම් කලාවද?




කළු වළාකුලට_______

අහසෙ දුරක ඉඳන්..
ගොරව ගොරව..
පා වෙලා ඇවිත්..
මගේ ඔළුවට උඩින් හිට ගත්තම මං බය උනා තමයි..
මං හිතුවෙ..මහ ධාරාණිපාත වැස්සකින් මාව තෙමල ලෙඩ කරවන්න කියල..
ටික වෙලාවකට පස්සෙ ඔයා අපහු ඈතට හුළඟ එක්ක ගහගෙන ගියා...
අව්වට මගෙ ඔළුව පිච්චෙද්දි තමයි තෙරුනේ..
වැස්සට තෙමුනත් ඔයාගෙ හෙවන කොච්චර සනීපද කියල


ජීවිතය_______ද?

ජීවිතය ලඟ නැත
අත පොවන්නේ නැත
ආදරය විසි කර
සොයන්නට යමි යන්න




සිනාසෙන තෙක්________

ගිණි අව්වට මහ වැස්සට
වේලුනු තෙමුනු
මහ කළුගලක්
ගෙන හෙමින් සීරුවට
ගල් කටුව තබමින්
මිටි පහර ගසමින්
කළු ගල් කැබළි කඩමින්
මතු කලෙමි සිත් පිත් නැති
සාලිය කුමරුවන්
අශෝක මාලා මෙන්
හැඳ පැලඳ මමත්
කොණ්ඩයට දාස් මලක්ද ගසා 

කැඩපතින් හැඩ බලා
මදක් සිනා සී
සිටගෙන පිළිරුව
ඉදිරියෙන්
බාලාසිටිමි
සිනාසෙන තෙක් කුමරුවන්
මා සමඟ




ප්‍රේමය නොවන ප්‍රේමය II

නීරස නවකතාවක
අලංකාර වූත් විච්ත්‍රවත් වූත්
පිටකවරය වගෙයි 
ඔබේ ආදරේ_________________




- ප්‍රේමය නොවන ප්‍රේමය -

හොරා ගත් හිත මතට
අතුරවා ආදරය
තැවරුවත්  හාදුවක්
හෙමි හෙමින් තොල් මතට
දැනෙන්නෙම හදවතට
''මට ඔයා පිට කෙනෙක්''



Sunday, July 17, 2011

ආදරය කරන්නවුන් කියන ජීවිතය_______

ගෙන ගියා ජීවිතය,,
විඳින්නට ඉඩක් නොතබාම,,
ආසයි මමත් දැන ගන්න,,,
පාට පාටද ජීවිතය
ආදරේ කරන්නවුන් කියන
ලෙසටම,,





රෝස පැහැ ලියුම් කවරය

නිවි නිවී දැල්වෙන
ඉටි පහන් දැල්ල යට
දෙනෙත් රතු වී බොඳව යනතුරු
හිරු නඟින යාමෙට
ලියා අහවර කෙරුනු
මගේ අවසන් කවිය
ඔබ නමින් පද බැඳුනු

බහාලූයෙමි ආදරේ පිරවූ
රෝස පැහැ ගත් පුංචි කවරෙක
කවි කතා පිරවුනු
දූවිලි වැදුනු පරණ පෙට්ටගම
ඇඳ යටින් ගෙන පිටට 

ඉබි යතුරු ගලවා තැන්පත් කලෙමි
ඔබේ ඇස නොගැටුනු
සියදහස් වර ආදරේ ලියැවුනු
කවි කොළ අතර
රෝස පැහැ ලියුම් කවරය




පර වුනු මල් __තාමත් ___සුවඳයි_______

හම්බුනා මට
රතු මල් ගවුම 
අල්මාරියක් අස්සක තිබිල,,

හොඳටම පරණයි,,
රතු පාට සායම් බොඳ වෙලා
පිච්ච මල් පරවෙලා ගිහින්,,

ආදර හාදු වැස්සකින්
ඒ මල් පිපේවි 
නැවතත්,,
ඔබ ආවොතින්,,

කොච්චර පරණ වුනත්,,
ගවුම උඩ ඒදා පිපුන මල්
තාමත් සුදු පාටයි,,
පරවුනත් තාමත් සුවඳයි,,
හරියට අපේ ආදරේ වගේ....




Saturday, July 16, 2011

රතු පාට මල් ගවුම __________

මං හෙව්ව පණ දාගෙන..
රතු පාට මල් මල් ගවුම..
මුළු ටවුමම පීරල..
පාරක් පාරක් ගානෙ..
කකුල් කඩිත්තුව හැදෙනකන්..
එදා අපි පාර දිගේ ඔහේ ඇවිදන් යන ගමන්..
මම ඔයාට නිකමට වගේ පෙන්නුවෙ..
කියන්නම දෙයක් නැති කමට
ඔයා,,
නිකමට වගේ මට ලස්සනට තියෙයි කිව්වෙ..
ඔව් ඔව්..එදා තමයි..
නිකමට වගේ ඔයා මට ආදරෙයි කියපු දවසෙ..
අද ඒ කඩේ එතන නෑ..
පදික වේදිකවෙ තිබුන කඩ සේරම නගර සභාවෙන් ඉවත් කරල..
අද ඒ ගවුම හොයන්නවත් නෑ..
අද ඔයා හිටියනම්..
නිකමට වගේ මට හරියන වෙන ගවුමක්
තොරල දේවි..




Friday, July 15, 2011

තත්පරයත් කල්පයක් ________________

සැනසීම නැති වෙලා 
දැන් මාසෙකටත් වැඩියි,,
මාව හොයාගෙන එන්න 
නැද්ද කල්පනාවක් දැන්ම,,

ඇස් වලට නිදිමතලු
දැන් පැය තුනකටත් වැඩියි..
හදවත,,
නැද්ද කල්පනාවක් දැන්ම
නිදා ගන්න,,

මං ආදරෙයි කියල,,
සතියක් වෙනව..
ඔයාට 
නැද්ද කල්පනාවක්..
මට ආදරෙයි කියන්න

ඔයාට මේ ගෙවෙන 
තත්පර ගැන ගානක් නැද්ද,,
මට නම් කල්පයක්..
නෑ නෑ ඊටත් වැඩියි,,

මහෙ හිත රිදවල
නිදි දෙව් දුවට වෙඩි තියල 
ඔයා අදත්
ගොරව ගොරව නිදිද,,,,




තිත්ත ඇත්ත_______________

විවාහයට පෙර:
ඔයා කියන දේවල් අහන් ඉන්න මම කොච්චර කැමතිද..ඔයා ඉන්නව නම් මට වෙන මොකුත් ඕනෙ නැහැ..
දවසක..ඔව් දවසක ඔයා එනවද..මගේ ලඟින් ඉඳගෙන..ගිරවියෙක් වගේ කියව කියව ඉන්න..
ඔයා ඕන තරම් කතා කරන්න..
ඔයා ගැන..ඔයාගෙ යාළුවො ගැනැ..එහා ගෙදර බල්ල ගැන..අලුතෙන් ගත්තු ඇඳුම ගැන..
මං ආසයි අහන් ඉන්න..ඔයාගෙ කතා කරද්දි ඔයාගේ ඇස් දෙක දිහා බලාගෙන ඉන්න..ඔයාගෙ තොල් දෙකට වඩා කතා කරන්නෙ ඔයාගෙ ඇස් දෙක..දන්නවද මට ආදරේ හිතෙනව..

විවාහයට පසු:
මොන වදයක්ද අනේ..කියවනව කියවනව ඉවරයක් නෑ..නිදාගන්න ගියත් කියවනව..අවිදින්න ගියත් කියවනව..පත්තරයක් බලන්න ගත්තත් කියවනව..
ඔයාට කියවල ඇති වෙලා නැද්ද..
අරය ගැනයි..මෙයා ගැනයි..එහා ගෙදර බල්ලො පූසො ගැනයි..අලුතෙන් ගත්ත සපත්තු ගැනයි..
මොන කන්දොස්කිරියාවක්ද..එ මදිවට..ඔය කතා කරද්දී එක දිගට ගැහෙන ඔයාගෙ ඇහි පිල්ලම්..ඔයාගෙ තොල් දෙක දිහා බලන් ඉන්නවට වඩා අමරුයි ..ඔයාගෙ ඇස් දෙක දිහා බලං ඉන්න..
''ඇයි අනේ ඔයාමනෙ කිව්වෙ..මං කතා කරද්දි ඔයට ආදරේ හිතෙනව කියල..මගෙ ඇස් දිහා බලන් ඉන්න ආසයි කියල..ඉතින් මං එකදිගට කියවන්න පුරුදු උනා....ඔය එපා කියනව නම් ඉතින් නවත්තන්නම්..මං ඉතින් ඔයා කූඩුවෙ දාල ඇති කරන්න ගත්ත ගිරවිනෙ..''


Thursday, July 14, 2011

- අහසට දැඩි අලාභ හානි -

අහසින් පර්චස් දහයක් ණයට ඉල්ලගෙන
අපි දෙන්න ඊයෙ රෑ පණ දාගෙන
එස් එම් එස් කොටල කොටල
හදපු මාලිගාවෙ
මුදුන් වහල
සුදුම සුදු වළාකුලකුත් ඉරාගෙන
අහස උඩටම නැගල...
හඳේ නිකටෙ වැදිල
දඩෝං ගාල..
ඔය අතරතුරේදි අහල පහළ හිටපු
පුංචි තරු කැට දෙකක් තුනක්
එහෙට මෙහෙට පැනල යන්තම් ඇඟ බේරගෙන,,,

බයවෙන්න එපා අනේ,,
එයාලට අපිට නඩු දාන්න බැහැ...


''අහසෙ මාළිගා හදන්න කාගෙන්වත් අවසර ඕනෙද..!!




Monday, July 11, 2011

- මිනීමරු පෙම -

කළු වළාවට තුරුළු වී සඳ
බලාගත් අත බලන් ඉනු කිම
හිරුට බැඳි පෙම හිතේ තද කර
ඉකි ගසා දුක් ගී ගයනවද

දෙකම්මුල් තෙත් කරන් වැගිරෙන
කඳුළු පිස දා නෙත් වසාගෙන
පහළ විල වෙත පැන්න පුන් සඳ
හිරුට නොකියම දිවි නසාගෙන

විලේ පතුලට කිඳා බැස ගිය
සඳේ සේයා සොයනු කෙළෙසක
දෙ අත් හිස් වූ කළු වළාකුල
රැයේ ඉකි බිඳ හඬනු ඵල නැත




Saturday, July 9, 2011

දවසක් හිටි හැටියෙම
වලාකුළු සළු
උනා දාල..
සඳ කිරණ පඩිපෙල දිගේ
පහලට බැහැල..
හඳ මගේ තුරුලට පැන්න..
හරිම උණුසුම්..
ඔය කියන තරම් කහ පාටත් නෑ..